Achin malcaćhu
Achin malcaćhümi müsu, lasaccunäpa juntunacuynin cala. Chaymanmi śhapämula lluy malcacunäpïta, tayta mamacuna, walaśh wamlacunäpis. Chay juntunacuyninmanmi ya'acunacta ayachipämäla yaćhachipäcunäpä. Chayćhümi “müsum wasinpïta licun” nishan libruwan yaćhachipäcunäpä, chay libructa aypuyta allaycapäcuptí lluy nunacunaca maquinta chacchalcamul libructa quitanacalälin, lïgipäcunanpä, licapäcunanpä. Chayćhü lïgïta mana yaćhäcunäñatacmi liträtuncunallacta licacaćhaycälil müsu lasaccunäman pasälälin. Ñatac Dominga, 40 ćhunca watayu walmim lïgiyta mana yaćhalpis cushisha-cushisha licacuyan lïgiy yaćhänüpis yaćhachicücäwan cusca. Caycunam masta callpanchaycapämäla lïgiyta, isquirbiyta wanca limayninćhu yaćhachipäcunäpä.
Wanca limayćhu Santa Rosa de Iláćhu uru/acapacunacta yaćhachiptí
Lluy uru/acapacunacta yaćhachiyta allaycuptïmi, puntallactá ash uru/acapacunalla śhapämula, sumä manchacalälisha. Chayćhu manam mayanpis wanca limayta limañächu, manatacmi lïgiñpäcuñäpischu. Waquincunam nila: "Mamänïwan awilämi chaytá limapäcun" nil. Ñatac yaćhachishäpam ash-ashllacta yaćhayculpis mastaña munacuyalcan. Chaymi paycuná yaćhayta
munayninwan callpanchaculcäla. Ishcay muyuncäćhüñatacmi ya'acuna nipäculá. "Canan'a manañaćh śhapämun'achu" nil llaquisha cayalcälá. Ñatac chay muyunpä lluy willanacälälil mas achcaña ćhälälimun. Chayćhu cushisha yaćhapäculmi nipäman: "¿Imaymi cutipämunqui yaćhachipämänayquipä? Tuquillam caña, mastam yaćhayta munapäcú" nil.
